వరంగల్ కేఏంసీ మెడికల్ స్టూడెంట్ ప్రీతి ఆత్మహత్య ఘటన తెలంగాణ వ్యాప్తంగా సంచలనం సృష్టించిన సంగతి తెలిసిందే. సీనియర్ల వేధింపులు తట్టుకోలేక ఫిబ్రవరి 22న ఆమె ఆత్మహత్యకు పాల్పడగా.. నిమ్స్ ఆసుపత్రిలో చికిత్స పొందుతూ ఫిబ్రవరి 26న మృతి చెందారు. ఈ కేసును సీరియస్‌గా పోలీసులు.. వేధింపులకు పాల్పడిన సీనియర్ మెడికల్ స్టూడెంట్ సైఫ్‌ను అరెస్టు చేసి కస్టడీలోకి తీసుకున్నారు. ప్రస్తుతం అతడు జైలులో ఉండగా.. ఈకేసులో విచారణ కొనసాగుతోంది.
అయితే ప్రీతి మృతి ఘటనపై ఆమె తల్లిదండ్రులు అనుమానాలు వ్యక్తం చేస్తున్నారు. తన కూతుర్ని హత్య చేసి ఆత్మహత్యగా చిత్రీకరించాని ప్రీతి తండ్రి నరేందర్ ఆరోపిస్తున్నారు. ఆమె బ్లడ్ శాంపిల్స్‌ను ఫోరెన్సిక్ ల్యాబ్‌కు పంపించగా.. టాక్సికాలజీ రిపోర్టులో సంచలన విషయాలు వెలుగులోకి వచ్చాయి. మెుదట ఆమె పాయిజన్ ఇంజక్షన్ తీసుకొని ఆత్మహత్యకు పాల్పడిందని పోలీసులు కేసు నమోదు చేయగా.. టాక్సికాలజీ రిపోర్టు సీన్ మొత్తాన్ని రివర్స్ చేసేసింది. ప్రీతి శరీరంలో ఎలాంటి ఎలాంటి విష పదార్థాలు కానీ, రసాయనాలు గానీ లభ్యం కాలేదని రిపోర్ట్‌లో వెల్లడైంది. రక్తం, గుండె, కాలేయంతో పాటు పలు అవయవాలను పరిశీలించిన డాక్టర్లకు.. ఎలాంటి విషపదార్థాలు లభించలేదని టాక్సికాలజీ రిపోర్ట్‌లో వెల్లడించారు.
దీంతో తలలు పట్టుకున్న పోలీసులు.. ఈ కేసులో లోతన విచారణ ప్రారంభించారు. ఈ నేపథ్యంలో ప్రీతి మృతిపై వరంగల్ సీపీ రంగనాథ్ తాజాగా.. కీలక కామెంట్స్ చేశారు. మెడికో ప్రీతి మరణానికి ర్యాగింగే కారణం అని ఆయన తెలిపారు. ప్రీతి మృతిపై లోతైన విచారణ కొనసాగుతోందని చెప్పారు. ప్రీతిది హత్య, ఆత్మహత్యా అన్న దానిపై ఇప్పటి వరకు ఎలాంటి ఆధారాలు లభించలేదన్నారు. పోస్టుమార్టం రిపోర్టు రావాల్సి ఉందని.. రిపోర్టు వచ్చాక అన్ని విషయాలు అందులో తేలుతాయని చెప్పారు.. సైఫ్‌కు మాత్రం శిక్ష తప్పదని అన్నారు.
