అదృష్టం ఎప్పుడు ఎవర్ని ఎలా వరిస్తుందో చెప్పలేం. అప్పటి వరకూ తినడానికి సరైన భోజనం దొరక్క ఇబ్బందిపడే కటిక బీదవాడు అదృష్టవశాత్తూ లాటరీ తగిలితే రాత్రికి రాత్రే కోటీశ్వరుడైపోవచ్చు. తాజాగా, ఓ గెస్ట్ వర్కర్ను అదృష్టం ఇలాగే వరించింది. అతడికి ఏకంగా రూ.10 కోట్ల లాటరీ తగిలింది. దీంతో ఓ నటి ఇంట్లో పనిచేసే వ్యక్తి ఒక్కసారిగా కోటీశ్వరుడయ్యాడు. అసోంకి చెందిన ఆల్బర్ట్ టిగా అనే వ్యక్తి కొచ్చిలో నివసిస్తున్నాడు. కొన్నేళ్లుగా రజిని చాందీ అనే నటి ఇంట్లో అల్పర్ట్ సహాయకుడిగా పనిచేస్తున్నాడు. అతడికి లాటరీ టికెట్లు కొనే అలవాటు ఉండటంతో కేరళ ప్రభుత్వం సమ్మర్ బంపర్ లాటరీ టిక్కెట్లు కొనుగోలు చేశాడు.
అల్బర్ కొనుగోలు చేసిన టిక్కెట్ నెంబరు SE 222282కి లాటరీ తగిలింది. ఈ లాటరీలో ఆల్బర్ట్కు అదృష్టం తన్నుకొచ్చి ఏకంగా రూ.10 కోట్లను గెలుచుకున్నాడు. దీంతో అతడి ఆనందానికి పట్టపగ్గాలు లేవు. పన్నులన్నీ మినహాయించగా అతడి చేతికి రూ.6.5 కోట్లు వచ్చాయి. అతడు కొనుగోలు చేసిన టిక్కెట్ ధర కేవలం రూ.250 మాత్రమే. లాటరీ టిక్కెట్ సహా పత్రాలన్ని బ్యాంకుకు సమర్పించిన అల్బర్ట్కు ప్రభుత్వ అధికారులు చెక్కును అందజేశారు.
